kitna aasaan moHabbat meN hai dhokaa karna

taraHey Ghazal:
~~~~~~~~~~~

1. kitna aasaan moHabbat meN hai dhokaa karna
varnaH yeh i'shq, faqat^ sar ka hai saudaa karna

2. kaun jaane hai bhala e'hd ka eefaa karna?
kaam aata hai yahaN sab ko hee da'waa karna

3. tum ne seekhaa hai kahaN? zikr yeh be-jaa karna
baatooN baatooN meN har ik baat peh uljhaa jkarna

4. apne kehne ka bharam rakh~ nah sako ge tum bhi
ph~ir kaho ge kabhi aisaa, kabi vaisaa karna

5. tum nah maano ge kabhi apni Khat^aaheN lekin
kabhi furSat meN meree baat peh sochaa karna

6. jo hoova mujh peh, gawaraa hai mujhee ko lekin!
***phir nah is-taraH kisee aur ko ruswaa karna ****

7. chand lamHooN meN bikhar jaatee hai dil kee dunya
u'mr lagtee hai ise joR ke yak-jaa karna

8. tum chale jaaho, palaT kar naheeN daikheN tum ko
shart^ yeh keh KhayaalooN se nah guzraa karna

9. D'oob jaho ge to saaHel bhi nah paaho ge kaheeN!
miree aaNkhooN ke samandar meN nah utraa karna

10. tum nah reh paho ge insaanoN ke jangal meN agar
phir kaheeN door pahaaRooN peh baseraa karna

11. kaun sikhlaye gaa hotee hai bhalayee kaise?
hai buraa kaam, burayee kaa bhi charchaa karnaa

12. yeh bhi nekee hai agar jaan lo sab se baRh kar
dost dushman ke kisee a'eb ka pardaa karna

13. ashk behte heN tu behne do Khuda ke aage
hooN nadamat ke, to SeHraa ko bhi daryaa karna

14. thak gayii chalte hoove baad-e-muKhalif :Raji:
ruKh~ hawaooN kaa idhar bhi kabhi moRaa karna

(Zahida Raees :Raji: )